2024 yil 14 avgustda O‘zbekiston Auditorlar Palatasi va DT ECOSYSTEM MCHJ o‘rtasida auditorlik faoliyatini rivojlantirish va takomillashtirishga qaratilgan strategik hamkorlik kelishuvi imzolandi. Ushbu kelishuv nafaqat auditorlar uchun, balki butun mamlakat auditorlik sohasining kelajagi uchun muhim ahamiyatga ega.

Kelishuvning asosiy jihatlari:

• Auditorlar Palatasi a’zolariga DT ECOSYSTEM MCHJ ning innovatsion IT-yechimlaridan foydalanish imkoniyati beriladi, bu ularning ish samaradorligini oshirishga yordam beradi.

• Auditorlik kompaniyalari uchun maxsus shablonlar va texnik qo‘llab-quvvatlash yordamida bepul professional veb-sahifalar yaratish imkoniyati taqdim etiladi.

• Auditorlar va ularning mijozlari o‘rtasida savol-javob formatida professional ma'lumot almashish imkoniyatini beradi.

• Zamonaviy IT-yechimlarni auditorlik amaliyotiga joriy etish bo‘yicha muntazam o‘quv tadbirlari o‘tkaziladi.

Kelishuvning muhimligini tasdiqlovchi fikrlar:

O‘zbekiston Auditorlar Palatasi Kengashi Raisi Ne’matulla Karimov bu kelishuvni yuqori baholadi: "Ushbu kelishuv a’zolarimiz uchun ilg‘or texnologiyalarni qo‘llash sohasida yangi imkoniyatlar ochadi. Biz DT ECOSYSTEM tashkiloti bilan hamkorlik qilish orqali O‘zbekistonda auditorlik xizmatlarining sifat va samaradorligini sezilarli darajada oshirishga ishonamiz."

DT ECOSYSTEM MCHJ direktori Odilbek Xudoyorov ham hamkorlikni yuqori baholadi: "Biz O‘zbekiston Auditorlar Palatasi a’zolariga o‘z tajribamiz va texnologik yechimlarimizni taqdim etishdan mamnunmiz. Ushbu hamkorlik mamlakatimizda auditorlik sohasini rivojlantirish va zamonaviy ish standartlarini joriy etishga qaratilgan."

Tomonlar ushbu hamkorlikni O‘zbekistonda auditorlik faoliyatini modernizatsiya qilish va uning xalqaro maydondagi raqobatbardoshligini oshirishda muhim qadam deb bilishmoqda.